இருட்டுக் குடுவை

என் இரகசியங்கள் எல்லாம்
ஒரு குடுவையில்
அடைக்கப்பட்டு
உன் எதிரில்
இருக்கிறது...

பரிமாற்றங்களின் பேரில்
உண்மையென்று
பொய்யை வெளியிலும்
பொய்யான உண்மையை
உள்ளிலும் பூசி வடிவாகியிருக்கிறது ...

உடைத்தல் ஒல்லாத
ஒரு கடினப் பாறையை
போர்த்திக்கொண்டு
அது மௌனித்திருக்கிறது...

என்னையும்
அந்த குடுவையையும்
மாறி மாறிப் பார்க்கிறாய்...

குடுவையின் மௌனத்தை
மீறி நான் நடுங்குகிறேன்.

குடுவையின் வாய் திறந்து
உள் நோக்கிப்
பாய்வாயோவென்ற
வலி மேலிட
பார்த்திருக்கையில்...

ஆழ் கடலுக்குள்ளதை
வீசிவிட்டு ...
எனக்கான இரகசியமற்ற
ஒரு வெளியை உருவாக்கி கொடு ....